446 يَا سَادَهْ يَا مَادَهْ، يِدِلْنَا وُيِدِلْكُمْ لِلْخِيرْ وُالشْهَادَهْ، بِيتْنَا حْرِيرْ وُبِيتْكُمْ كِتَّانْ وُبِيتْ العْدُو تِشْطَحْ فِيهْ الفِيرَانْ. كْلَامْنَا بِالتَّرْتِيبْ أَحْسَنْ وُعَجِيبْ، أَنَا وُإِنْتُومَا هَاتْ نْصَلِّيوْ عْلَى النَّبِي الحْبِيبْ. كَانْ يَا مَا كَانْ، وُفِي قْدِيمْ الزْمَانْ، رَاجِلْ دَجَّالْ وُدِيمَا يِدُورْ مِنْ قَرْيَهْ لِقَرْيَهْ، يِبِيعْ فِي الأَوْهَامْ وُيِعَدِّي فِيهَا عْلَى النَّاسْ، وُكِيمَا قَالُوا نَاسْ بِكْرِي: يِمْشِي الجَافِلْ وُيِجِي الغَافِلْ. وُفِي نْهَارْ مِنْ نْهَارَاتْ، وُفِي قَرْيَهْ مِنْ القُرَى، وُفِي نْهَارْ السُّوقْ، جَا وُحَطّْ النَّصْبَهْ مْتَاعُو، يِبِيعْ فِي سِلْعِتُو الغَرِيبَهْ، وُالنَّاسْ مَاشْيَهْ عْلِيهْ وُجَايَهْ، وُمُحَضِّبِينْ عْلِيهْ النَّاسْ الكُلّْ، وُتِشْرِي مِنْ عَنْدُو. وُهُوَكَا مْتَعَدِّي بِالصُّدْفَهْ، رَاجِلْ مَعْرُوفْ فِي القَرْيَهْ بِالحِكْمَهْ وُرَجَاحَةْ العَقْلْ، شَافْ النَّاسْ مْلَمُّومِينْ عْلَى حَاجَهْ وُمُتْهَافْتِينْ، وُكِيفْ سَأَلْ شْنِيَّهْ الحْكَايَهْ بِالضَّبْطْ، خَبْرُوهْ اللِّي ثَمَّهْ رَاجِلْ فِي السُّوقْ يِبِيعْ فِي الأَرَاضِي فِي الجَنَّهْ، وُبِحُجَّهةْ المِلْكِيَّهْ زَادَا، وُاللِّي يِتْوَفَّى وُمَعَاهْ الحُجَّهْ طُولْ يِمْشِي لِلْجَنَّهْ وُيِسْكُنْ فِي الأَرْضْ اللِّي شْرَاهَا مِنْ عَنْدُو، وُالنَّاسْ جَادَّهْ عْلِيهَا الهَدْرَهْ وُتِشْرِي مِنْ عَنْدُو، طَامْعِينْ فِي الجَنَّهْ بَعْدْ المَوْتْ. الرَّاجِلْ الحْكِيمْ قْعَدْ بَاهِتْ فِي النَّاسْ اللِّي صَدَّقُوهْ، وُقْعَدْ حَايِرْ كِيفَاشْ يِنْجِمْ يِقْنِعْ هَالبَشَرْ بَانْ هَالدَّجَّالْ قَاعِدْ يِتْحَيَّلْ عْلِيهُمْ وُيِدَجِّلْ عْلِيهُمْ. وُبَعْدْ تْخَمّامْ عَمِيقْ، جَاتُو فِكْرَهْ عَبْقَرِيَّهْ. وُمَشَى لِلدَّجَّالْ وُسَأَلُو عْلَى سُومْ القْطْعَهْ فِي الجَنَّهْ، وُجَاوْبُو بِالوَقْتْ وُقَالُّو:بِمِيَّةْ دِينَارْ. وُقْتْهَا قَالُّو الحْكِيمْ:وُكِيفْ نِحِبّْ نِشْرِي قْطْعَهْ فِي جَهَنَّمْ، تِنْجِمْ تْبِيعْهَالِي؟ وُقْتْهَا اسْتَغْرَبْ الدَّجَّالْ وُقَالْ:تْنَجَمْ تَاخُذْهَا بْلَاشْ. قَالُّو الحْكِيمْ:لَا، مَا نَاخْذْهَا إِلَّا مَا نْخَلِّصْكْ وُتِعْطِينِي حُجَّهْ المِلْكِيَّهْ. جَاوْبُو وُقْتْهَا الدَّجَّالْ وُقَالُّو:نَعْطِيكْ رُبْعْ جَهَنَّمْ بِمِيَّةْ دِينَارْ، وُهِيَ سُومْ القَطْعَهْ فِي الجَنَّهْ. وُقَالُّو الحْكِيمْ:وُكِيفْ نِحِبّْ نِشْرِي جَهَنَّمْ بِكُلْهَا؟ قَالُّو:وُقْتْهَا تِعْطِينِي أَرْبْعْمِيَّةْ دِينَارْ وُنِعْطِيكْ جَهَنَّمْ الكُلّْ. وُبِالفِعْلْ، بَاعْلُو جَهَنَّمْ الكُلّْ، وُعْطَاهْ الحُجَّهْ مَشْهَدْ عْلِيهَا الحَاضِرِينْ الكُلّْ وُقْتْهَا. خْرَجْ الحْكِيمْ مِنْ عَنْدُو، وُهُوَ يِنَادِي بِأَعْلَى صَوْتُو فِي السُّوقْ:يَا جْمَاعَهْ، يَالِّي تِسْمَعُوا، يَا مُومِنِينْ، رَانِي شْرِيتْ مِنْ عَنْدْ هَالرَّاجِلْ جَهَنَّمْ الكُلّْ، وُمَنِيشْ بَاشْ نِسَمِّحْ لِحَتَّى حَدّْ يِدْخُلْ لِحَتَّى شِبْرْ مِنْهَا، خَاطِرْ وَلَّاتْ مِلْكِي وُحَلَالِي بِمُوجِبْ الحُجَّهْ اللِّي عَنْدِي، وُالحَاضِرْ فِيكُمْ يِبَلِّغْ لِلْغَايِبْ، وُمَا بْقَالْكُمْ كَانْ القِطَعْ اللِّي فِي الجَنَّهْ، سَوَاءْ شْرِيتُوهَا وَلَّا مَا شْرِيتُوهَاشْ. وُبِالوَقْتْ، وُبَعْدْ مَا سِمْعُوا النَّاسْ كْلَامْ الحْكِيمْ، اللِّي النَّاسْ الكُلّْ تْقَدْرُو وُتِحْتَرْمُو وُتْصَدَّقْ اللِّي يِقُولْ، بِعْدُوا عْلَى الرَّاجِلْ الدَّجَّالْ، وُمَشَاوْ عْلِيهْ، وُمَعَادْ يِقْصْدُوا حَتَّى حَدّْ. وُعَرَفْ اللِّي هُوَ كَانْ أَغْبَى مِنْ النَّاسْ اللِّي يِتْصَوَّرْ أَنُّو عَدَّاهَا عْلِيهُمْ، وُيِسْخَايِلْ رُوحُو عَدَّاهَا حَتَّى عْلَى الرَّاجِلْ الحْكِيمْ، وُاللِّي وَظَّفْ الذَّكَاءْ مْتَاعُو وُرَجَاحَةْ عَقْلُو، بَاشْ يِفْضَحْ الدَّجَّالْ وُيِنْصِبْلُو مَنْدَافْ مَا كَانْشْ مُتَوَقِّعُو، وُحُصُلْ فِيهْ. وُمِلِّخْرْ، الوَاحِدْ مِنَّا مَا يِنَجَمْ يِشْرِي الجَنَّهْ كَانْ بِالعَمَلْ الصَّالِحْ وُطَاعَةْ رَبِّي وُفِعْلْ الخِيرْ. وُحْكَايِتْنِي تْعِيشْ تْعِيشْ مَعْ حْكَايَاتْ دَرْوِيشْ. هشام درويشباحث وحكواتي – تونس