185مَرْحْبَا بِيكُمْ فِي حْكَايَهْ جْدِيدَهْ مِنْ حْكَايَاتْ كَانْ يَا مَا كَانْيِحْكِيوْ عَلَى طْفُلْ مِزْيَانْ ..عَنْدُو بَرْشَا حُبْ الإِطِّلَاعْ وُدِيمَا هُوَ يِسْأَلْ وُيِحِبْ يِعْرَفْ كُلْ شَيْءْ مَحْسُوبْ كِيمَا الصْغَارْ الكُلْ …وُفِي نْهَارْ مِنْ نْهَارَاتْ يِشُوفْ فِي أُخْتُو الكْبِيرَهْ تِبْكِي وُبِالوَقْتْ سْأَلْهَا عَلَاشْ هِيَ تِبْكِي؟جَاوْبِتُّو وُقَالِتْلُو: نِبْكِي مِلْفَرْحَهْ يَا خُويَا الصْغَيرُونْ ..الطْفُلْ رْجَعْ لْبِيتُو مَا فَاهِمْ شَيْءْوُبَعْدْهَا بِمْدِيدَهْ يِشُوفْ فِي أُخْتُو قَاعْدَهْ عَلَى البَنْكْ وُتِتْفَرَّجْ فِي التَّلْفْزَهْ وُهِيَ تِبْكِي ..وُعَاوِدْ الطْفُلْ سْأَلْهَا عَلَاشْ هِيَ تِبْكِي؟جَاوْبِتُّو وُقَالِتْلُو: سَخَّفْنِي البَطَلْ مْتَاعْ الفِيلْمْ اشْ صَارْ عَلِيهْ مِنْ مْحَايِنْ …يَاسِرْ الفِيلْمْ مَحْلَاهْ.الطْفُلْ قْعَدْ مِشْوَارْ حْذَاهَا عَلَى البَنْكْ وُمِنْهَا مْشَى لِأُمُّو فِي الكُوجِينَهْ يَلْقَاهَا حَايْسَهْ تْحَضَّرْ فِي المَاكْلَهْ …وُسْأَلْهَا وُقَالِلْهَا: عَلَاشْ النْسَاءْ تِبْكِي أَكْثَرْ مِرْجَالْ؟أُمُّو قَعْدِتْ حَايِرَهْ مِتْحَيِّرَهْ وُتْقُولِشْ عَلِيهَا تْغِشْمِتْ بِالسُّؤَالْ وُمِنْهَا قَالِتْلُو: يَا وُلِيدِي رَاكْ مَازِلْتْ صْغِيرْ عَلَى المَوَاضِيعْ هَاذِي …حَصِيلُو فِي لْخِرْ قَعَدْ الطْفُلْ دِيمَا مِنْ غِيرْ إِجَابَهْ عَلَى سُؤَالُو …وِالطْفُلْ بْدَا يِكْبِرْ وُالسُّؤَالْ قَاعِدْ يِكْبِرْ مْعَاهْ..وُفِي نْهَارْ مِنْ نْهَارَاتْ وُهُوَ فِي دَارْ عْزِيزُو …يِشُوفْ فِي حَاجَهْ حَرْكِتْلُو فُضُولُو وُهُوَ عَادْ مُوشْ نَاقِصْ حُبْ اطِّلَاعْ …يِشُوفْ فِي مَمَاتُو وُهِيَ قَاعْدَهْ تُغْزُرْ لِتْصَاوِرْ قْدِيمَهْ لِلْعَايِلَهْ وُدْمِيعَاتْهَا قَاعْدِينْ يهْبْطُو عَلَى التْصَاوِرْ …بِالدَّمْعَهْ بِالدَّمْعَهْوُبِالوَقْتْ سْأَلْ عْزِيزُو وُهُوَ مِتْحَيِّرْ عَلَى مَمَاتُو وُقَالْ: بَابَا عْزِيزِي عَلَاشْ أَمَيْمَهْ تِبْكِي؟جَاوْبُو عْزِيزُو وُهُوَ يَضْحَكْ وُقَالْ: تِبْكِي خَاطِرْهَا كِي شَافِتْ التْصَاوِرْ تْفَكْرِتْ صُغْرْهَا وُالأَيَّامَاتْ الحْلُوَهْ.وَقْتْهَا الطْفُلْ قَالْ: آهْ هَاذَاكْ عَلَاشْ النِّسَاءْ دِيمَا تِبْكِي …وُهُوَ كُلُّو أَمَلْ بَاشْ يَلْقَى إِجَابَهْ عَلَى سُؤَالْ وُاللِّي مْحَيِّرُو دِيمَاغْزَرْلُو عْزِيزُو وُقَالُّو: النِّسَاءْ تِبْكِي لْعِدَّةْ أَسْبَابْ يَا وْلِيدِي …النِّسَاءْ عَلَى قَدْ مَا تْرَاهُمْ حَسَّاسِينْ …عَلَى قَدْ مَا يِكُونُو قْوِيينْ …النْسَاءْ عَنْدْهُمْ طَاقَهْ بَاشْ يِكَوْنُو كَايِنْ مَنْ كَانْ فِي هَالْعَالَمْ اللِّي هُوَ رَاجِلْ المُسْتَقْبَلْ…النْسَاءْ يَا وُلِيدِي قَادْرِينْ يِكُونُو سَنَدْ لِأَيْ كَانْ …المْرَا يَا وُلِيدِي عَلَى قَدْ مَا هِيَ قْوِيَّهْ كِيفْ الحْجَرْ عَلَى قَدْ مَا هُوَ إِحْسَاسْهَا رْهَيِّفْ رَهَافَةْ أَوْرَاقْ النَّوَّارَ..دْمُوعْ النْسَاءْ يَا وُلِيدِي نُقْطَةْ ضَعْفْ فِي قُوَّهْ مِتْكَامْلَهْدْمُوعْ النْسَاءْ تِنَجَّمْ تْكُونْ دْمُوعْ فَرْحَهْ ..دْمُوعْ وْجِيعَهْ ..دْمُوعْ تَأَثُّرْ ..وَلَّا دْمُوعْ حَنَانْ …دْمُوعْ عُمْرْنَا مَا نْنَجْمُو لَا نْحَاكْمُوهَا وَلَا نْحْكْمُو عَلِيهَا…دْمُوعْ النْسَاءْ تْنَجَّمْ تْكُونْ مَصْدَرْ قُوَّةْ المْرَا …كِيمَا تْنَجَّمْ تْكُونْ عَلَى خَاطِرْ كُلْ مَنْ يِحِيطْ بِالمْرَا سَوَاءْ أَوْلَادْهَا …رَاجِِلْهَا …خُوَاتْهَا…وُوَالْدِيهَا…دْمُوعْ النْسَاءْ يَا وُلِيدِي يِلْزِمْ نِفْهْمُوهَا وُنِتْفَهْمُوهَا …نِحْتَرْمُوهَا وُزَادَا نِسْمْعُوهَا وُنْحِسُّوهَا …بَاشْ المْرَا تِحِسْ رُوحْهَا مَفْهُومَهْ وُمَحْبُوبَهْقَدَّاشْ عْزِيزَهْ … دْمُوعْ النْسَاءْ …هشام درويشباحث وحكواتي – تونس