حاتم بن حورية: قصيد بعنوان “غزّة و البركان”

تتشرّف المجلة الثقافية نيابوليس بنشر قصيدة “غزّة والبركان” للشاعر الشعبي القدير حاتم بن حورية الذي شارك بها في مجلس الأنس والأدب في دورته الرابعة تحت شعار: “الشعر يجمعنا… والحلم يوحدنا” بتنظيم من مجالس الأنس والأدب بنابل وذلك يوم الأحد 29 جوان 2025 بالفضاء العائلي بروكس بنابل

القصيدة:

ڨلبي مثيل بركان
هايض مليان
داحم داهم على خوّان

قوم نوض وأرفع أعلامك
ويزّي ما رڨدتّي سنين
وخوذ ثمن دفع رحامك
ويزّي ما هزّيت رزين
قدّاش إدّمرت أحلامك
وقدّاش خسرتي ممّو العين
زيدي تشبثي بإسلامك
وكل شهيد من الصّابرين
وكوني متمسكة بكلامك
تحيا تحيا فلسطين
ولا إطّيعي ضباب أوهامك
ولا يصيبك وهم الخاسرين
وإصقل في رڨابهم حسامك
وما تسخف على الغدّارين
كيما ڨبل نهشوا عظامك
وجات الضربة على المسلان
إنت الفوق وهوما أقزامك
والذيب ما يسخف عالخرفان

ڨالو بعد الشدّة يجي لفرج
وينو لفرج من بعد سنين؟
صبري نفذ من عڨلي خرج
الشي رزن والصبر رزين
يا عرب آش فيكم عوج
ڨولولي واش بيكم ساكتين
الدّم فات الركبة بلغ الودج
والصهيوني من الذبّاحين
ذوّڨهم علڨم مرّار حدج
والدّمع جف وعبّا الكفّين
هااااتوا خلّينا نحلّوا البلج
ويزّينا من رڨاد الخامدين
نحلًوا في جيش الصّهيوني فج
ونذوڨوا طعم المنتصرين
نديرو زلزال ع الصّهيوني يترج
يشڨڨ ينسف يخلخل الأركان
دافڨ دفّاڨ يدفڨ بنارو يسرج
ينظفها لفاعي وضبوعة وغربان

يزّي ما صبرتي أعوام
ويزّي ما سكتّي دهور
بسواعدك ترفع الأعلام
حان الوقت باش تثور
على كل خاين ومسمام
وسفح الدّم المهدور
أرشم في أرضك الأرصام
وخلّي جلادك محصور
وفي جرذانهم وفّي الأرقام
لا يرفعهم بر ولا بحور
وإغرس فيهم ناب الضّرغام
ما دامة لحمهم منكور
كدّس لحمهم أكوام أكوام
يغدى عشاء للكلاب مجزور
هكّا يركّز يتلفّتك الإعلام
ويرفع رايتك في كل مكان
مرفوعة موحّدة بالإسلام
منصورة بإذن الله الرّحمان
والڨلب مثيل بركان
هادد مليان
داحم داهم على كل خوّان